Q, Querul- und andane Antn
Mia noch! Und schee hintaranand, und im Abstand vo genau 12 Zantimeta! ordnet de Antenmuadda o.
A so hod ses vo ihrahna Muadda glernd, wann ma gscheid daucha und schwimma leana wui. A jäds Junge, wos se ned dro hoid, wead sofort zrechd gwiesn und zupfd.
Noch vier Wocha fangan aba wäiche o, dass nebaranand schwimma, und andane ham nua 6 Zantimeta Abstand.
Ja, wos foid eich denn ei, kennds iah ned in da Reih bleim? schimpfd de Oide.
Konn i scho, erwiedert oans vo de Junga, aba mia machds meahra Gspaß, wann i nebam Bruada schwimm, wei nacha brauch ma uns ned oiwei drum streitn, wer zerschd kimmd.
Und de Oide zwick de Junga in de Seitnfedan, wei ses so glernd hod, boi ebban ned foigd.
De nächsde schwimmd im Abstand vo nur 6 Zantimedda. Und wiede schimpfd de Oide: Konnst du di ned an meine Regeln hoiddn, 12 Zantimedda hamma gsogd!
Des woas i scho, aba mid 6 Zantimedda bin i im Wassaschattn, und dann gähds Vorokumma vui leichda.
Und de Oide zwick des Junge in de Seitnfedan, wei ses so glernd hod, boi ebban ned foigd.
Noch sechs Wocha hoidn se imma weniga an de Vorgabn, und de Oide konns ned oiwei kontrolliern, weis beim Schwimm noch vorn schaung muass und ned noch hint. Und des is außadem so wos wia ra Gesetz vom Universum: Boisd vorwärts kumma wuist, muasd noch vorn schaung!
Jädnfois fangand wäiche o, dass ned da Längs noch im Wassa schwimman, wia ses glernd hom, oiso rauf oda runter, sondan quer zum nächstn Ufa zuawe.
Iah seids ja echde Querul-Antn, kriangs zum Hean vo de andan, aus eich wead woi nia wos gscheids, oda?
Ja mei, antwortns, des habs doch scho in da Jugend gseng, dass ma mia de Regeln a weng kreativ ausleng, oda ned oda? Und uns machds hoid an Heidnspaß, andasda zum Schwimma. Des schod doch koam vo eich, oda?? Duads ebba wem wäh?
Da nächsde fliagd mid schlaff obgwinkelte Flügeln spiralig noch untn. De oan san ganz begeistert und song: Hey, so wos hamma no nia ned gseng. Respekt! Schaug da des ned oo! Des kimmd ganz elegant rüber.
De andan song: So wos gspinnerts. Ma ko doch grodaus obi fliang, wia mas oiwei scho gmachd hom.
Aba da vorige kommentiert: Und jetzad sog i eich wos: Des is mir völlig wurschd, wos deoan oda de andan dazu moanand, wei i mach oafach genau des, wos mia am Moment am meisdn Freid machd. Und manchmoi muass i des richtig gähad übn, damit dass des perfekta Kreisl wead. Des gor ned so oafach wias ausschaugd. Wems ned gfoid, der brauchd ja nua wegschaung, oda? I muas genau des entwickeln und doa, wos in mia oglegd is. Nix andas neda.
Da nächsde landt auf oamoi midm im Baam auf am broadn Ast.
Des gibts doch ned, reng se manche auf, ma ko doch oisara Antn ned am Baam landn, des hods no nia geem. Ma landt imma im Wassa. Des konnst doch ned bringa! Hosd ned ghead, wia se de Rabn lustig gmachd hom?
Doch, des gähd scho, sogd da vorige, wann ma nämli an broadn Ast dawischd, und den da Längs noch ofliagd, oiso wia an Boikn. As Problem is nua, dass i mi ned lang drauf hoidn ko, wei unsane Fiaß ned zum Greiffa gmachd sand sondan nua zum schwimma. I muass oiso glei wieda weida fliang. Und de Rabn krahn an ganzn Dog irgand a Zeigl, des hod mid uns nix z doan. Des hod nua fiade untaranand a Bedeitung. Leichd kummd ja moi ebban vo uns drauf, wia ma des übasetzn ko. Des waar a scheens Beispui für a Sonderbegabung. Aba do samma wieda am gleichn Punkt: Damit oana do drauf kummd, dassa a Talent zum Übasetzbn hod, muass ea zerschd amoi in si säiba eini gspürn. Und ihr machds doch nua, wos ma seit 10000 Johr so oisara Antn duad. Ohne genau zum Gspürn. Es seids regelrechde Konform-Antn. Do brauchads eich nix drauf eibuidn. Übahaupts nix.
Da nächsde probiert an Looping. Des gähd zerschd amoi schiaf, und er landt mid am Platschara im Wassa.
Do is a Gschroa aufkemma: Jetzand sans völlig übagschnappt, head ma de oan song, de Querul-Antn.
Aba de erwiedern: Wos sois, solang ma neamd andan damit an Schoon zuafügd! Und zum rausfindn, wos unsaoam guad duad muas ma doch des oane oda andane ausprobiern! Des wead doch no erlaubt sei, oda ned oda? Und `s wead uns ned glei as Leem kostn. Moands ihr im Ernst, dass eich des weida bringd, boids ihr nua nochmachds, wos zuvor jemand eigführt hod, es Konform-Antn? Bloß, wei z es ihr vasamds, rauszumfindn, wos Bsundas in eich steckt, brauchds üba unsaoam ned so heaziang. Is doch wohr!
De lassn aba ned locka: Wann a jäda wos andas machd, nacha woas ma am End gor nimma, wos eingli a Antn ausmachd.
Aba uns gfoids, wos Neichs zum daleem und zum ausprobiern. Boi ma scho de Schangs hod im Leem.
Aba sägds ihr ned des Schwanen-Baarl? Schaug, wia sa se üba uns lustig machand und aufplustern!
Aba des machand de doch oiwei, wannsa se wichtig macha woin, vor ollem, damit dass dem Kini imponiern, oda dass eahna de Leid a Fuada geem.
Aba wann a jäda wos andas machd, hamma mia doch gor koa Identität nimma mea!
Doch, wann a jäda sei Authentizität entdeckt und entwickelt, dann sand mia de oanzign Vegl mid ara persönlichn, unverwechsel-baren Persönlichkeit. A jäda is a Persönlichkeit und gibd sei Bests, wos eahm am meisdn gfreid. Mia waarn ma de „Bsunder-Antn“.
Aba des klingd doch reichlich elitär, oda ned? Und des is doch a zusätzliche Arwat, wo ma scho mim Fuadda-Findn gnuag zum doan ham.
Des mog scho sei, aba de Arwat lohnt se, denn da Lohn is a Leem mid vui mehr Lust am Leem, und a Zuawachs an Freid. Und du woasd genaua, wofüa du eingli do bist. Und du gspürsd, wia si des ofuid, as inwendige Glück, a inwenige Harmonie und a inwendiga Friedn.
De zwoa Lager vo Antn, oiso de Querul-Antn und de Konform-Antn, schramma imma moi wieda knapp an am Gefechd vorbei, aba es kimmd ned dazua. Wei do kummand dann de ganz andan dazwischen, de lachand se krumm und bucklig. Brah-ha-ha-ha-ha, heasd as ruaffa, brah-ha-ha-ha-ha. Dreimoi hintaranand. Des kummd nacha vo de Komödi-Antn.