Tiger und Stuumtiger oder:
Glück und Unglück lieng vaflixt nah beinand.
Oder: Verschiednerlei Anschläge und warum se fast oiss uman voin Mong drahd.
Mimis rauhe Jugendzeit
Wias da Deifi wui is de kloa Mimi zum Raucher-Roland kemma, des hoaßt, er hod sie ois letzte von am Wurf übanomma. Seine Freind ham eam nua Landi ghoassn. Da Landi is an jädn Dog seiner Arbat nochganga und lassd sei Katzl ganz alloa in da Wohnung zruck. Grod dassa ihra a Fuada histäid, aba des kimmd aus da Dosn und fangd nocha Stuckara fünf Stund as stinga o.
De Mimi war aba aa stinksaua, weis ihrane Briada nimma seng deaffa hod und weisase ordentli glanggweild hod. Am Omd zündt er si gern sei Zigarettn o und qualmt damid sei Bude voi. Zmoi frogd er de Mimi: „Na, wia war dei Dog? Wos is im Busch? Wos gib’s Neichs?“
„Saubläde Frog,“ moand sie grantig, „du sparrst mi an ganzn Dog ei, und zur Entspannung deaf i mia dein Ruass einiziang. Oiso woasdas, a volla Mong is ned oiss im Leem. Mid dir is a rechd grausigs Dasein.“
„Ja guad“, entgengd er mürrisch, „nacha gäh i hoid an Balkon aussi zum Raucha, obwois scho undda Nui Grod hod. Und zur Abwechslung konnsd an Fernsäh einischaung“.
So wiara aba draussd is und sein zwoaddn Lungatorpedo oschmeissd, hupfd de Mimi mid Anlauf gega de Balkontür und hengd se am Griff ei. Des hods insgeheim scho a boor Dog lang trainiert und es klappt wia am Schnüarl. Der Tür schnappt zua, da Griff kippd nach undd, de Katz foid aufn Bodn – und de Tür is varrammed. Vo außen lassd sa se nimma aufmacha. Den hob i schee gleimd, denkd se de Mimi, hoffentlich bin i den zeitlang los.
Da Landi hod gschauggd wiara Schweibal wanns blitzd und denkd se: So a bläds Viech. De lassd mi pfeigrod draussd dafriern.
Aba noch drei Minuten foid eahm ei, dass ar a Handy in da Hosndaschn hod. Und er ruafd de Feiawaar, dass eahm obahoin. De zoang se ned grod begeistert und macha eahm Vorwürf, dassa doch an Schlüssldienst bstäin häd kenna. Und si hindalassn a saftige Rechnung wegen selbstverschuldetem Fehlalarm.
Des machsd du mia koa zwoads moi ned, übalegd da Landi, und gibt de Mimi an sein Cousin, dem Ranger-Robert weida.